الأهلي يوضح موقف إمام عاشور ووليد صلاح الدين بعد التواصل مع طبيب الفريق

إمام عاشور ظهر ببيان عبر إنستجرام، ووضح فيه سبب غيابه عن سفر الأهلي لتانزانيا، وأكد إنه كان عنده دور برد شديد.

موقف الأهلي من اعتذار إمام عاشور

مصدر مسؤول من النادي الأهلي قال لـ “أحداث اليوم” إن إمام أبلغ أحمد جاب الله بمرضه، لكن عدم تواصله مع مدير الكرة وإغلاق هاتفه كان خطأ كبير، وأكد المصدر إنهم متقبلين عذره لكن العقوبة هتكون موجودة، هيتدرب لوحده لمدة أسبوعين مع غرامة مالية، وقرار مشاركته بعد كده هيكون بيد المدرب تورب.

إمام عاشور يعتذر لجماهير الأهلي

نص اعتذار إمام عبر ستوري إنستجرام كان كالتالي: “للأسف في كلام مغلوط عن اللي حصل، وأنا متقبل أي قرار من النادي، وواثق إن المسؤولين في الأهلي هيفهموا موقفي. فعلاً عندي دور برد جامد ودرجة حرارتي عالية، وباخد مضادات حيوية. للأسف كل أسرتي عندها نفس الأعراض. أنا بلغت الدكتور أحمد جاب الله بظروفي الصحية، لكن كان المفروض أتواصل مع الكابتن وليد صلاح الدين عشان يبلغ المدير الفني. الموضوع اتقفل خلاص، وأنا تحت أمر النادي. جمهور الأهلي دايمًا سندي بعد ربنا، وبعتذر للنادي والجهاز الفني وزمايلي، وأنا فخور إني بلعب في أكبر نادي في أفريقيا. علاقتي بالجمهور مش هتتقسم، وأرجو من الجميع إغلاق هذا الموضوع. الناس اللي بتقول إن إمام عايز يلوي دراع النادي، بقولهم حسبي الله ونعم الوكيل. محدش يقدر يلوي دراع الأهلي، وأنا اتشرفت بارتداء الفانلة الحمراء وعمري ما قصرت في حق النادي أو جمهوره. وجودي في الأهلي يعوضني عن كل حاجة، وعندنا ماتش بكرة مهم، يارب كل التوفيق لزمايلي والجهاز الفني ونحقق الفوز اللي يسعد كل الأهلاوية.”