محمود عبد المنعم كهربا مستني يعرف مصيره خلال الساعات الجاية بعد ما الأهلي رفض يرجعه للقلعة الحمراء، خصوصًا بعد ما فسخ عقده مع القادسية الكويتي.
ووفقًا لمصادرنا من داخل الاتحاد السكندري، الفريق الكبير قرب من حسم صفقة كهربا في انتقال حر خلال فترة الانتقالات الشتوية الحالية لموسم 2025-2026.
ومع قرب انتقال كهربا لارتداء قميص الاتحاد السكندري قبل غلق باب القيد الشتوي، علمنا إن الجلسة اللي حصلت يوم السبت بين محمد سلامة رئيس النادي وكهربا بحضور وكيله أحمد يحيى وعبد الظاهر السقا المدير الرياضي، انتهت من غير ما يوصلوا لاتفاق نهائي، وده ممكن يفتح المجال لفشل الصفقة ويخلي كهربا يقعد لحد نهاية الموسم من غير فريق.
كمان اتحاد الكرة أخطر جميع أندية الدوري المصري بموعد غلق باب القيد بالميركاتو الشتوي، اللي هيكون يوم الأحد، وبداية القيد كانت يوم 1 يناير لحد 8 فبراير، وآخر موعد للقيد هيكون الساعة 12 منتصف الليل يوم الأحد.
كهربا: الأهلي محتاجني حاليًا.. ومش بفكر في الزمالك
كهربا عبر عن أمنيته في العودة للأهلي بعد فسخ تعاقده مع القادسية، وقال في تصريحات إذاعية إنه الأهلي محتاجه فنيًا وخارجيًا، وبيحلم يرجع مرة تانية ويعدهم إنه هيقدم أداء مميز، وذكر إنه مفيش اتصالات رسمية بينه وبين إدارة الأهلي في الوقت الحالي، لكنه لو الأهلي طلبه هيرد بسرعة.
وأوضح إنه تواصل مع إمام عاشور، واللي مش معترض على العقوبة، وإمام مركز في تدريباته عشان يرجع أفضل، وأضاف إنه مفيش داعي نعلق الأخطاء على بعض، كلنا بنغلط ولازم نساند بعض، وأكد إنه الزمالك فريق كبير، لكن صعب إنه يرجع له، وهدفه الحالي هو الانضمام لنادي جماهيري عشان يثبت نفسه بعد تجربة مش ناجحة مع القادسية.
التعليقات