أيمن الشريعي، رئيس نادي إنبي، اتكلم عن إدارة الفريق البترولي ورأيه في الدوري الممتاز، خصوصًا مع الانتقادات اللي بتواجه المسابقة حتى بعد إنشاء رابطة جديدة تدير البطولة.
الشريعي قال في برنامج “الناظر” مع أحمد شوبير: “أنا متابع لكل اللي بيحصل، لكن مش بتدخل في شغل جهاز حمزة الجمل، هو وكافة الجهاز الفني لاعبين دوليين سابقين، وحمزة مدرب يشتغل بضمير. ظلم كبير وقع على لاعبي إنبي بعدم انضمامهم لقائمة منتخب مصر في كأس العرب، وكمان عندي أزمة مع حلمي طولان لأنه كان عايز يرحل لاعبين، وده شغل الإدارة بس”.
وانتقل للحديث عن الأهلي، فقال: “محمود الخطيب نجح في إدارة الأهلي سواء عجب ده حد أو لأ، وأنا أخدت مستحقاتي كاملة من صفقتي مصطفى شلبي وزياد كمال وحمدي فتحي. مصطفى كان متجه للأهلي بس ما حصلش نصيب. إدارة رابطة الأندية ومستوى التحكيم هذا الموسم جيدين، وكنت ضد إلغاء الهبوط السنة اللي فاتت عشان ما يتكررش كل موسم، ومش متوقع إلغاء الهبوط هذا الموسم، لازم يتطبق حتى لو على حساب إنبي”.
في النهاية، قال الشريعي: “أندية الاستثمار مهمة للكرة المصرية، ومن غيرها مش هتنجح المنظومة. عندي اقتراح بدمج الأندية الشعبية مع الاستثمارية لصناعة معادلة شاملة. الهدف عندي إن إنبي يحتل المركز الثاني في الدوري بفارق الأهداف”.
أيمن الشريعي كمان فتح قلبه في حديثه مع شوبير عن موضوع التعاقد مع محمود كهربا، نجم الزمالك والأهلي السابق، خلال الانتقالات الشتوية للموسم الحالي.
انتقال كهربا
قال الشريعي: “كان لازم نتعاقد مع كهربا لأنه ابن إنبي، وأنا اللي طلبت التعاقد معاه وتواصلت لإنهاء الصفقة، لكن لازم يعرف الجميع إن تعاقدنا مع اللاعب لنهاية الموسم فقط والاتفاق كان من غير شروط عشان نساعده في إعادة تأهيله”.
التعليقات