شوبير: ابني أهلاوي وعقده أقل من 5 ملايين جنيه

رفض الإعلامي أحمد شوبير السكوت عن موضوع مستقبل نجله مصطفى شوبير مع الأهلي، خصوصًا مع قرب انتهاء عقد الحارس مع الفريق بنهاية الموسم الحالي 2025-2026.

شوبير يكشف الحقائق على الهواء

قال شوبير خلال برنامجه “الناظر” على قناة النهار: “الموضوع ده أول وآخر مرة هتكلم فيه، مفيش أي كلام رسمي مع مصطفى شوبير عن التجديد، القصة كلها إن عقد مصطفى هو الأقل في الأهلي، حتى اللي قالوا إنه بياخد 5 مليون جنيه، هو عمره ما وصل لعقد زي ده”

وواصل أحمد شوبير حديثه وكشف الحقائق: “الكابتن خالد بيبو كان فاتحه في التجديد من سنتين، لكن مفيش جلسة، وكابتن محمد يوسف برضه حاول، ولكن مفيش حاجة حصلت، اللاعب مركز في تمريناته ومش مشغول بأي حاجة تانية، مصطفى موقع مع وكالة إسبانية، والأمور كانت واضحة مع كابتن محمد يوسف قبل الموسم، لما سألوه عن الرقم اللي محتاجينه، رد عليهم وقال لهم مفيش حاجة اسمها نادي، انتو قولوا الرقم، وبعد 3 ساعات كان رد محمد يوسف إن مصطفى شوبير ليس للبيع”

وعن مستقبل نجله مع الأهلي، أضاف أحمد شوبير: “بعد كده جالهم عرض رسمي من نادي الخلود للضم، لكن الأهلي رد عليهم إن مصطفى شوبير مش للإعارة ولا للبيع، القصة مقفولة، مصطفى أهلاوي وابن أهلاوي وعقده ممتد لحد نهاية الموسم القادم، وهو تحت أمر الأهلي، لكن كل الكلام اللي بيتقال من إمبارح غير صحيح تمامًا، مفيش أي مفاوضات ولا تمديد ولا حتى ترضية، اللي أنا مش بحيها، لأن أساسًا حصلت من سنتين أو ثلاثة، قالوا ترضية، ومفيش حاجة حصلت، لأن المفروض اللاعب يلتزم بعقده، دي قصة مصطفى شوبير من الألف للياء”