كشف حسام المندوه، أمين صندوق نادي الزمالك، عن آخر تطورات قضية أرض أكتوبر، حيث أوضح تفاصيل الأزمة اللي ممكن تنقذ النادي من مشاكله المالية.
أزمة الأرض
قال حسام المندوه في تصريحات له ببرنامج “الكابتن” مع أحمد حسن على قناة DMC: “الاستثمار العقاري مهم جدًا في الوقت الحالي، وكنا بنسعى لده، لكن ليه الأرض متبنيتش لحد دلوقتي؟” وأضاف: “لما جينا وشوفنا الأرض، لقيناها ما لمستهاش أي يد من 20 سنة، إلا حاجة بسيطة جدًا، ولازم يكون عندنا سيولة ونعرف نعمل استثمار جيد، عندنا أرض مخصصة لنادي رياضي، ونادي استثماري زي الفرع الرئيسي في ميت عقبة، وده محتاج إننا نرجع نستثمر مرة تانية، وهو ده السبب في تأخيرنا”.
وتابع: “تعاقدنا مع مستثمرين لكن حصلت مشكلة بسبب بعض القرارات الخاصة بالأرض، وكنا حنقدر نحصل على مليار و600 مليون جنيه في سنتين”. وكمل: “مضينا عقد مع شركة كانت حتدخل 600 مليون جنيه، وكنا مخططين إن الفلوس هتكون موجودة، الزمالك نادي وطني مش هيتأخر عن قرار زي ده، والسؤال الأهم، هل هنكمل في الأرض ولا هنلاقي أرض بديلة عشان نعيد فكرة الاستثمار، لأنه الحل الجذري لنادي الزمالك”.
وبخصوص إن أرض الزمالك هي الحل الوحيد، قال: “عملنا شغل كتير تاني، زودنا رعاة الزمالك، والمحال الخارجية كانت إيراداتها جزء منها هيتاخد لحد 2040، المحلات اللي كانت خارج الخدمة دخلناها في مزادات وأجرناها لفترات قصيرة، مش 20 أو 30 سنة زي ما حصل قبل كده، وده اللي خلانا نعيش نادي الزمالك بالشكل ده السنتين اللي فاتوا”.
وعن أرض أكتوبر، قال: “فيه ثبات في رد الفعل، وبشكر أشرف صبحي، وننتظر من وزير الإسكان والشباب والرياضة النظر في الملف ده، الزمالك وجماهيره منتظرين رد فعل سريع بخصوص أرض أكتوبر، لأنه هيكون مطلوب مننا دراسة جدوى لبناء الأرض الجديدة وتمويلها”.
وأضاف: “أرض أكتوبر مشروع قومي لنادي الزمالك، عندنا مشكلة من ثبات الموقف لحد دلوقتي، وحتى مع وجود أشرف صبحي كان فيه أرض بديلة، وكان المفروض نحصل على أرض جديدة استثمارية بنفس المزايا”.
واختتم: “في الحالتين هنجهز الدراسة، ولسه ما اتحددش موقع أرض بعينها، لكن فيه أراضٍ كتير، ولو الأرض أقل في المساحة هيكون فيه تعويض بشكل من الأشكال، ممكن نسب السداد تكون ميزة بـ ميزة، وده كان كلامنا مع أشرف صبحي، ولم نلتقي بالوزير الجديد لحد دلوقتي”.
التعليقات