آرني سلوت، المدير الفني لفريق ليفربول، متفائل بخصوص الاستثمارات الكبيرة للنادي في الانتقالات الصيفية، ويعتقد أن النتائج ستظهر بمجرد انتهاء أزمة الإصابات اللي بتواجه الفريق.
ليفربول صرف 600 مليون دولار على صفقات الصيف، وجاب لاعبين زي فلوريان فيرتز، ألكسندر إيزاك، جيريمي فريمبونج، ميلوس كيركيز وغيرهم.
لكن للأسف، الصفقات ما جابتش الفايدة المتوقعة، وبقت آمال ليفربول في الحفاظ على لقب الدوري الإنجليزي ضئيلة، والطموح دلوقتي هو التأهل لدوري أبطال أوروبا الموسم الجاي، وكمان التفكير في إمكانية التتويج بلقب البطولة.
وعلى جانب آخر، ليفربول لسه مستمر في المنافسة بكأس الاتحاد الإنجليزي ودوري أبطال أوروبا، بعد ما تأهل لدور الـ16 في البطولتين.
سلوت اتسأل كتير عن إنفاق ليفربول، وكان سؤاله في المؤتمر الصحفي يوم الجمعة، وعلق على الموضوع بقوله: “حاولت 450 مرة أقول إننا بعنا لاعبين بـ300 مليون جنيه إسترليني، بس ده مش بيتسجل أبداً ولا حد بيتكلم عنه”
كمل كلامه وقال: “بشكل عام، ما بشوفش غير كلمة (أنفق ليفربول 450 مليون جنيه إسترليني، 450، 450، 450…)، لا حد بيشوف الظروف، ولا حد بيدرك إن المبلغ ده اتصرف بحكمة، هم لاعبين عظماء هينجحوا معانا، بعضهم دلوقتي وبعضهم في المستقبل”
وأضاف: “احنا بعنا لاعبين بـ300 مليون جنيه إسترليني، والبعض منهم زي أرنولد بـ10 ملايين، وكان لازم نعوض المبلغ ده ببيع لاعبين تانيين”
وأشار: “صرفنا حوالي 250 مليون جنيه إسترليني، وإيزاك مش هو اللاعب اللي كان في نيوكاسل، يمكن لعشرين دقيقة بس قدام توتنهام، مش بانتقده لأننا جابناه لمدة ست سنوات مش ستة أشهر”
وأكد: “جيرجي مامارداشفيلي كنا محتاجينه بعد رحيل كيليهر، لكن نادراً ما لعبنا بحارسين بس، جيريمي فريمبونج عنده إصابات كتير، وجيوفاني ليوني هيغيب حتى نهاية الموسم، وهنفتقد فيرتز قدام وست هام، هو وإيكتيكي وكيركيز محتاجين وقت للتأقلم”
التعليقات