الكابتن مصطفى يونس أثار الجدل بتصريحاته الأخيرة عن تحليل كرة القدم، خلال ظهوره في برنامج «ورا الشمس» مع ياسمين الخطيب، لما قاله عن أن السيدات مش مناسبين للتحليل الكروي.
مصطفى يونس وضح إن الكرة محتاجة خبرات عملية طويلة في الملعب، سواء كلاعبيين أو مدربين أو في الإدارة الفنية، واعتبر إن التحليل الكروي محتاج خلفية احترافية وتجارب مباشرة في أجواء المباريات.
تصريحاته جات في سياق حديثه عن تطور الإعلام الرياضي في الفترة الأخيرة، وانتشار المحللين على القنوات المختلفة، وأكد إن تقييم الأداء الفني لازم يبقى مستند على معايير واضحة وخبرة حقيقية في المجال.
التصريحات أثارت تفاعل كبير على السوشيال ميديا، بين مؤيد لرأيه اللي شاف إن التحليل بيعتمد على الخبرة الفنية، وبين معارض ليه اللي أكد إن الكفاءة مش مرتبطة بجنس أو نوع، بل بالمعرفة والدراسة والخبرة العملية.
الكابتن مصطفى يونس، نجم الأهلي ومنتخب مصر السابق، اتكلم عن جوانب من حياته الشخصية وعدد زيجاته، وذكر إن فيه أحداث شبيهة بقصة الحاج متولي.
4 زيجات وقصص الطلاق السريعة
مصطفى يونس خلال لقائه مع ياسمين الخطيب، قال إنه اتجوز 4 مرات، وأضاف: «في جوازتين مايتحسبوش.. واحدة 3 أسابيع والتانية 3 شهور، الله يرحمها» وأشار إن السبب في انتهاء بعض زيجاته بسرعة كان مرتبط بتأثير أولاده على قراراته، وأكد: «وأنا طلقتهم عشان مين؟ عشان أولادي مصطفى وميار»
ربنا فوق وهم تحت
وعبر مصطفى عن مكانة أولاده في حياته، وقال: «أنا أولادي بحبهم جدا.. يعني ربنا فوق وهم تحت» وأكد إن المشاكل اللي حصلت مع الأبناء في الزيجات السابقة هي اللي دفعته للانفصال، لحد ما لقى الاستقرار في زواجه الأخير اللي استمر 30 سنة لحد دلوقتي
نقطة ضعف مصطفى يونس
وعن علاقته بأبنائه الأربعة وأحفاده الخمسة، أكد يونس إن ابنته ميار ليها مكانة خاصة عنده، ووصفها إنها مفتاح السر في العيلة، وقال: «ميار دي بالنسبة لي يعني حتة مني.. يعني اللي عايز حاجة من مصطفى يقول لـ ميار»
في نفس السياق، مصطفى يونس كشف عن تفاصيل من حياته الشخصية، وقال إن واحدة من الراقصات الشهيرات عرضت عليه الزواج وهو في سن العشرين، وأشار إنها كانت منبهرة به، ولفت إنها اعتزلت الرقص بعد كده.
وأوضح إنها طلبت منه الزواج، وقال: “أنا اتخضيت وقولتلها أنا مقدرش ومن ساعتها مشفتهاش تاني” وذكر إن اسمها “نادية” وأكد إنه مش بيضعف قدام حد إلا أحفاده وبنته الوحيدة “ميار”
التعليقات