شركة القلعة الحمراء تكشف مستجدات مشروع استاد الأهلي

محمد كامل، رئيس مجلس إدارة شركة “القلعة الحمراء”، تحدث عن آخر المستجدات في مشروع استاد النادي الأهلي، وأكد إن الشغل ماشي حسب الجدول الموضوع، مع متابعة مستمرة من إدارة النادي واهتمام بتنفيذ المشروع بأعلى مستوى ممكن.

وفي تصريحات له عبر صفحة “القلعة الحمراء” على فيس بوك، قال محمد كامل: “الشغل ماشي بشكل جيد جدًا، والموضوع أكبر بكتير مما يتخيله أي حد، الناس عايزة تشوف الاستاد، ومش مهتمة بأي حاجة تانية؛ كل تركيزها على رؤية الاستاد”

من ناحية تانية، تابع كامل: “لكن إنشاء الاستاد محتاج شغل كتير مرتبط بيه، سواء في محيطه أو تحته، ولازم نخلص التصاميم المختلفة، الموضوع مش بس حفر أو إنشاء، لكن الأهم إننا ماشيين حسب البرنامج الزمني بدقة، مدة المشروع 146 أسبوع، ولسه عندنا وقت كافي، نستعد وبإذن الله هنبص على مراحل متقدمة جدًا في الإنشاءات والخرسانة”

وأضاف: “كل الأمور ماشية بشكل جيد، ونأمل إن توفيق الله يستمر معانا، لازم الناس تعرف إننا مع المشروع ده ليل ونهار؛ نصحى الصبح على متابعته وننام واحنا بنفكر فيه، في شغل كتير وتفاصيل معقدة وتحديات، إحنا مش عايزين نشارك الآخرين في التحديات دي، بل بنحاول نحلها بنفسنا، لحد دلوقتي مفيش أي حاجة وقفتنا، الشغل ماشي بشكل جيد جدًا”

وفي سياق متصل، أشار إلى إن “شركة الأهلي للمنشآت بتقدم شغل مميز معانا، وفي تعاون رائع ودعم قوي من مجلس إدارة النادي الأهلي، الكابتن محمود الخطيب بيتابع المشروع معانا بشكل مستمر، في النهاية ده مشروعنا كلنا، وإحنا بنشتغل كفريق واحد، اللي بشوفه هو انسجام، ونتمنى إن العمل ده يتوج بالنجاح في النهاية”.

وشدد: “جمهور الأهلي دايمًا واقف مع الفريق، وإحنا عايزينه يتعامل معانا زي ما بيتعامل مع الفريق؛ إنه يثق في القلعة الحمراء وفي الأشخاص اللي اخترناهم لتنفيذ المشروع، لأنه مشروع القرن، محتاجين ثقتكم ودعمكم كل يوم، ونحتاج نسمع تشجيعكم، ونبقى عارفين إنكم معانا، لأن كل واحد بيبذل أقصى ما عنده عشان يخرج المشروع بصورة عالمية تليق بالجمهور، وعلشان كده محتاجين دعمكم”

واختتم: “بإذن الله هيجي يوم جمهور النادي الأهلي وكل من شارك في المشروع هيكونوا موجودين في الاستاد، وهيشوفوا الملعب والجميع مبسوط، وهيكونوا قاعدين في مقاعد مريحة وفي أجواء منظمة، وقتها هيشكروا كل واحد بذل جهد في المشروع، وهم كتير وبيشتغلوا بكل طاقتهم، ضعوا ثقتكم في القلعة الحمراء، وبإذن الله هنعمل حاجة تليق بيكم وتفخر النادي الأهلي قدام العالم كله”