علق أحمد حسن، قائد منتخب مصر الأسبق، على هزيمة الأهلي المفاجئة أمام طلائع الجيش في المباراة اللي جمعت بينهم ضمن الدوري المصري.
تلقى الأهلي هزيمة صعبة بنتيجة 2-1 في المباراة المؤجلة اللي اتلعبت على استاد الكلية الحربية.
قال أحمد حسن في تصريحات لقناة أون سبورت: “فوز طلائع الجيش على الأهلي يعتبر فوز كبير في حدود الإمكانيات، وما حصل مش معبر عن روح الأهلي”
وأضاف: “الفريق كان ناقصه الثقة، وحسيت إن اللاعبين كانوا خايفين، ودي مش الروح المطلوبة لتصحيح الأوضاع”
وتابع: “تغيير المدرب وطريقة اللعب يتحملوا جزء من المسؤولية، لكن الأهم إن روح القميص الأحمر كانت غايبة، ما شفتش لاعب يشجع زميله خلال المباراة، وكل واحد كان في حاله”
وذكر: “طلائع الجيش ضيع فرص كتير في الشوط الأول، لكن الأهلي عنده مشكلة في استقبال الأهداف بشكل مبالغ فيه هذا الموسم”
وبسؤاله عن إمكانية رحيل المدرب توروب، قال: “باقي في الدوري 6 مباريات، ومش سهل التغيير في الوقت ده، إلا لو الأهلي اتفق مع عماد النحاس، الأهلي في موقف صعب والمهمة على المدرب”
أضاف: “اللاعبين هم اللي يصنعوا المدربين، عليهم مسؤولية كبيرة والروح القتالية لازم تكون موجودة، الشناوي وتريزيجيه لازم يجتمعوا مع باقي اللاعبين، الموضوع مش بس في المدرب”
واختتم: “في عشوائية واضحة، مفيش طريقة لعب محددة ولا فرص حقيقية، ده مش شكل فريق ينافس على الدوري، وجمهور الأهلي من حقه يكون متضايق من اللاعبين، لأن غياب الروح كان من أهم أسباب الهزيمة”
التعليقات