هاني رمزي، نجم الأهلي السابق، عبر عن انزعاجه من أداء الفريق في الفترة الأخيرة، مشيرًا إلى أن الأمور مش ماشية زي ما المفروض. في الوقت ده، الجماهير متأثرة جدًا بالموقف.
قال هاني رمزي، خلال حديثه في قناة أون سبورت: “النادي الأهلي بيمر بظروف صعبة جدًا، وده ناتج عن بعض الأخطاء في إدارة ملفات معينة بشكل غير جيد، حزين زي الجماهير، لكن دايمًا بقول إن الأهلي في أصعب اللحظات يقدر يرجع بقوة”
وفي نفس السياق، أضاف: “المدير الفني عليه جزء كبير، لكن اللاعبين كمان عليهم جزء، اختيارات المدير الفني لم تكن في المستوى المطلوب، وخروج بعض اللاعبين كان غير مناسب، والصفقات الجديدة لم تكن بنفس الجودة، وده أثر على أداء الفريق، ملف صفقات يناير كان فيه أخطاء كثيرة جدًا”
كمان أشار: “بدا يطلع علينا أرقام كبيرة جدًا للاعبين، وده بقى عبء على النادي، مفيش حاجة اسمها ترضية للاعبين، لما اللاعب يكون موقع على عقد لمدة ثلاث سنوات، مفيش بعد سنة تطلب ترضية، ده بعيد عن الاحترافية، ولازم يكون فيه وقفة، كل ده أثر على أوضة اللبس”
واستكمل: “شخصية توروب والأداء الفني مش متناسبين مع الأهلي، وأنا مع الاستقرار الفني بشكل كبير، الأهلي تعاقد مع مدربين كتير في الفترة الأخيرة”
واستطرد: “رحيل توروب دلوقتي صعب جدًا، عندنا مباراة بعد 5 أيام، وشرط جزائي بأرقام كبيرة، مجلس الإدارة في موقف صعب”
وفي النهاية، قال: “لو توروب رحل، البديل لازم يكون مدير فني مصري، عندنا علي ماهر وعماد النحاس وحسام البدري، الأهلي لسه في المنافسة على الدوري، ولازم يكون له خطة واضحة في الفترة الجاية”
التعليقات