أحمد شوبير تناول في آخر تصريحاته كواليس مهمة داخل النادي الأهلي، خصوصًا فيما يخص قطاع الناشئين وبعض الملفات الإدارية، بجانب تفاصيل عن الجماهير وملف الرعاية واسم الاستاد.
قال شوبير في فيديو على قناته في “يوتيوب”: “قطاع الناشئين في الأهلي يحتاج لعملية غربلة كبيرة، وأطالب الإدارة بالنظر للجانب المالي، الرواتب للمدربين ضعيفة جدًا، وكمان بالنسبة لجهاز الفريق الأول، الأطباء، والعلاج الطبيعي، والإداريين، الرواتب مش في المستوى اللي يليق بالنادي الأهلي”
وأكد شوبير: “أنا مش ببالغ، في أمور مهمة في الأهلي، لو هنقيم لازم نعيد التقييم بجدية، مفيش عيب في وجود أخطاء، لكن العيب الأكبر هو الاستمرار في نفس الخطأ”
وأضاف: “المطلوب من إدارة الأهلي في الفترة الجاية هو تقييم جميع العاملين في قطاع الكرة وإداراته وأجهزته الفنية والإدارية والطبية، لازم إعادة هيكلة بشكل جاد، مش مجرد مسكن للغضب الموجود عند الجماهير”
استكمل شوبير: “لازم تكون فيه قرارات حقيقية وملموسة، لازم الجماهير تحس بالقرارات، وتحس إن الإدارة قريبة من مشكلاتهم، ممكن تقول لي إزاي الكلام ده، وفي نفس الوقت الأهلي استجاب لضغط السوشيال ميديا ورحل كولر؟”
وأشار شوبير: “فيه أمور واضحة للجميع، وبكده التغيير بقى حتمي، جماهير الأهلي مش بس السوشيال ميديا، هي جماهير المدرجات، طول عمرها جماهير داعمة حتى لو مفيش أمل في الدوري، لكنهم بيظهروا قوتهم ومساندتهم”
تابع: “وبالمناسبة، مفيش حد بيتحبس بسبب إنه راح الملعب، الموضوع ده انتهى، حتى بعد مباراة الجيش الملكي، التحقيق مع البعض، كانوا موجودين في اليوم التالي، ودي كانت أكثر مباراة شهدت تجاوزات”
استكمل: “ومع ذلك مفيش هتافات بتخلي حد يتحبس، مفيش تكسير للمدرجات أو اشتباكات، وبالتالي موضوع إن حد يتاخد من المدرج للحبس مفيش، الموضوع ده انتهى مع قانون الرياضة الجديد”
اختتم شوبير: “فلا حد يعلق شماعات على الموضوع، مفيش حد اتاخد من المدرج، لو حد عنده أسماء يقولها، لو أثبتوا العكس هعتذر، لكن ده مش بيحصل”
التعليقات