الإعلامية سلمى الجابري، زوجة اللاعب أحمد رمضان بيكهام، شغلت السوشيال ميديا بعد ما نشرت رسالة على إنستجرام تدافع فيها عن محمد الشناوي حارس مرمى الأهلي ومنتخب مصر، بعد الضجة اللي حصلت حول صور منسوبة له مع سيدة بتدعي إنه متجوزها سرًا.
سلمى كتبت: «أول مرة هبقى مع الرجالة بس هقول حاجة حصلت معايا شخصيًا، البنت دي اسمها رنا ومن سنتين كانت بتبعتلي رسائل وكنت مش فاتحة، وبتقولي كلام حلو، ومكنتش عندي مشكلة، وشوفت الصورة عندها وهي بنفسها قالتلي إنها AI»
كمان أضافت: «ممكن البنت تكون مش عايزة تعمل كده، بس تفاهة الصحفيين خلتها تكمل، وممكن تكون مش متزنة نفسيًا، لأن دي مكنتش أول مرة أشوف صورة بالـ AI مع لاعب»
وسلمى اختتمت كلامها: «لما سمعت الموضوع مكنتش مهتمة أشوف الصورة، وكنت شايفة زي كل الناس إن البنت هتكدب ليه، ودي حوارات اللعيبة و lifestyle بتاعهم، بس سبحان الله في راجل طلع مظلوم»
وفي نفس السياق، رنا أحمد، الفتاة اللي أثارت الجدل، نشرت منشور طويل على إنستجرام تكلمت فيه عن تفاصيل علاقتها مع محمد الشناوي، وبتقول إنها فضلت صامتة فترة طويلة احترامًا لنفسها، لكن خلاص قررت تكشف الحقيقة.
رنا قالت: «أنا سكت فترة طويلة احترامًا لنفسي، لكن كفاية لحد كده، مع إني كنت بشوف كومنتات سلبية وناس بتهاجمني، قررت أتكلم وأوضح الحقيقة اللي حصلت بيني وبين محمد الشناوي»
أضافت: «ما كانش مجرد تعارف أو كلام عادي، الموضوع وصل لارتباط وجواز بشكل سري، وعمر صاحبه كان شاهد على كل حاجة وشاهد على جوازنا، أنا وافقت على الكلام ده لأنه صدقني لما قاللي إنه بعد فترة هيعلن»
وتابعت: «لما قلت إني ممكن أكشف الحقيقة، تم تهديدي إنهم هيرفعوا علي قضية تشهير، وبعد ما شافوا إني مصممة على قراري، بعت لي شخص اسمه كريم رزق مدير السوشيال ميديا السابق في النادي، وعرض عليّ فلوس مقابل إني أسكت»
استكملت رنا: «أنا محتفظة بكل الرسائل والفيديوهات من إنستجرام وواتساب اللي تثبت كلامي ده، وهنزلها كلها، وأنا ما بقولش الكلام ده علشان أعمل مشاكل، لكن علشان أوضح الحقيقة وأدافع عن نفسي»
المنشور بتاع رنا عمل ضجة كبيرة على السوشيال ميديا، خاصة مع تأكيدها إنها عندها أدلة هتكشف عنها لاحقًا.
أول تحرك للشناوي
بعد تصريحات رنا، تواصلت أحداث اليوم مع مصدر مقرب من محمد الشناوي، وكشف إن حارس مرمى الأهلي والمنتخب سيتخذ إجراءات قانونية ضد رنا لنفي زواج الحارس منها.
حذف الاستوري والفبركة
بعد نشر تصريحات المصدر، رنا أحمد حذفت الاستوري نهائيًا بعد ما كشف الخبير التكنولوجي المهندس محمد مغربي عن فبركة صورها مع الشناوي بالذكاء الاصطناعي.
كتب مغربي عبر صفحته إن الصور المنتشرة مش حقيقية ومتفبركة ببرامج AI، وطلب من الناس يستخدموا مواقع متخصصة للتحقق من الصور.
بيان رسمي من المحامي
بعد ساعات قليلة، أصدر مكتب محمد واصل محامي الشناوي بيانًا رسميًا، أكد فيه إنهم هيتخذوا كافة الإجراءات القانونية ضد أي شخص بينشر أخبار كاذبة للتشهير والشهرة.
التعليقات