حسام عبد المنعم، لاعب الزمالك ومنتخب مصر السابق، فتح قلبه عن معاناته الحالية بعد فترة طويلة بعيد عن الملاعب، كاشفًا عن الظروف الصعبة اللي بيعيشها بسبب غياب مصدر دخل ثابت يعينه على أسرته.
في تصريحات له ببرنامج «كلم ربنا» مع الإعلامي أحمد الخطيب عبر الراديو 9090، قال حسام: عندي 5 أولاد وعايش من غير دخل، رغم إنني كنت لاعب دولي في الزمالك، بقالى سنين عاطل من غير شغل، بعد ما كنت في عز الشهرة
وتابع: حالي دلوقتي صعب جدًا، لدرجة إن أبويا اللي كان دايمًا يفتخر بيا، بكى وقاللي: “يا ريتك ما لعبت كورة”!، الكلمة دي أثرت فيّ، لأنه شايفني محتاج شغل ومصاريف، ونادي الزمالك ماعملش معايا حاجة، وحاسس إني لوحدي في بحر من الهموم
وأضاف: مش لاقي غير ربنا، بقوله فك كربي، أنا عايز أفرح عيالي وأديهم أمل، بس حاسس بالعجز، لكن عندي يقين إن ربنا مش هيخذلني، هو اللي هيديني الأمل مهما كانت الظروف صعبة
وأكد: المجال الرياضي مش سهل، ومش عارف أشتغل فيه، طول عمري كنت بلعب كورة، ودلوقتي قاعد في البيت، عندي زوجتين و5 أطفال محتاجين مني كل حاجة
وواصل: مش لاقي صاحب أو صديق في الزمالك، رغم إنني قضيت أحلى سنين حياتي في النادي، صاحبي الوحيد هو ربنا، ودلوقتي محدش بيسأل عليا من اللي كنت بلعب معاهم، بقيت أكلم ربنا عن رزقي، هو بس اللي سامعني
استمر حسام: أنا قريب من ربنا، ولولا إيماني كنت خسرت نفسي، بفكر إزاي كنت في القمة دلوقتي وبقيت بعيد عن الأضواء، كل ده اختبار من ربنا
وأشار: خريج سياحة وفنادق، لكن معرفش عنها حاجة، طول عمري كنت بلعب كورة، لعبت 8 سنين في الأهلي وبعدها الزمالك، جيلي كان مليان أسماء كبيرة
رغم كل ده، دلوقتي بعيد عن الملاعب، واللي كان حلمي بقى ذكرى، وأنا مستني الفرج من ربنا اللي هو سندي، وهو اللي بيهون عليا كل الهموم.
أنا اللي اكتشفت مصطفى محمد وقدّمته للزمالك، في كأس مصر سنة 98، جبت هدف الفوز على الإسماعيلي، الجمهور انفجر فرحة، لكن محدش افتكرني بعد كده.
دلوقتي مستني الفرج من ربنا، مش قادر، بكلم ربنا وأسأله: أنا عملت إيه عشان أوصل للحال ده؟ محدش من مسئولي الزمالك سأل عليا ولا فكر يسأل عن حالي، رغم كل اللي قدمته للنادي
اختتم: الناس نسوني، لكن واثق إن ربنا مش هينساني، بقوله يارب فك كربي، وأنا مؤمن إن الفرج جاي، ده اختبار صعب بس العوض من ربنا أعظم من كل وجع، حتى لو اتنسيت، هفضل واثق إن ربنا هو اللي هيجبر كسري
راحت الشهرة والنجومية والفلوس، لكن ربنا هو اللي فاضل معايا، هو الباقي، سبحانه.
التعليقات