أقطاي عبد الله: انضممت للزمالك أثناء وجودي في طنطا وبدأت مشواري مع الإسماعيلي

قال أقطاي عبد الله، لاعب إنبي الحالي وسبق له اللعب في طنطا، إنه بدأ مشواره في أكاديمية الإسماعيلي في كفر الشيخ لمدة سنتين، وبعدها انتقل لناشئي غزل المحلة، لكن تجربته هناك ما كملتش بسبب توقيعه بعد فترة القيد، وبعد كده استمر في مركز شباب محلة مرحوم، ومنه انتقل لطنطا اللي اشتراه بعد تألقه في صفقة بـ 5 آلاف جنيه، وارتدى قميص الفريق لمدة 3 سنوات، وطلع للفريق الأول بعد موسم واحد، ولعب تحت قيادة المدربين عمرو أنور ونبيل المحروقي وعمرو صابر، وخلال الفترة دي أثبت نفسه لحد ما جاء له عرض إنبي.

وفي تصريحات لبرنامج نجوم دوري نايل مع أحمد المصري عبر إذاعة أون سبورت إف إم، أضاف “أقطاي” إنه أثناء تألقه مع طنطا في الدرجة الأولى جات له عروض كتير من أندية الدوري الممتاز، كان من بينها غزل المحلة، لكن المسؤولين في طنطا كانوا عايزين عرض أكبر بمقابل مادي أعلى.

وفي مفاجأة كبيرة، أكد أقطاي إنه وقع للزمالك بشكل شخصي بعد جلسة مع حسين السيد، عضو مجلس إدارة الزمالك، لكن ما حصلش تواصل بين إدارتي الناديين، وبعدها حاول وكيلي إنهاء الاتفاق لكن ما تمش، وفي نفس الوقت جاله عرض من إنبي، ورغم إنه كان أقل ماديًا من عروض تانية، لكنه وافق وانتقل للفريق البترولي.

وواصل أقطاي حديثه عن إنبي، وقال إنه نادي كبير، وبيشكر ربنا على وجوده فيه وعلى الخطوة المهمة دي في مسيرته الكروية.

واختتم أقطاي كلامه إنه اسمه غريب شوية، لكن الحمد لله عجبته، والده هو اللي اختاره، وفي ناس كتير بتسأله عن معناه وبتقوله إنه اسمه حلو، والحمد لله.