النادي الأهلي بيعيش فترة صعبة بعد خروجه من دوري أبطال إفريقيا، وفي وسط الأجواء دي، أحمد حسن قرر يتكلم عن الوضع في النادي ويقول رأيه بصراحة عن الأمور اللي محتاجة تتصلح في الفترة الجاية.
أحمد حسن قال في تغريدة على «إكس»: «لم أكن أود التعليق على الأحداث الساخنة داخل النادي الأهلي، ولكن بصفتي فرد في المنظومة الرياضية وتشرفت باللعب في النادي الأهلي وتمثيله في المحافل الدولية، كان لابد أن أتحدث عن بعض الأمور»
استكمل حديثه وقال: «منذ وقت طويل وأنا أتحدث عن المشاكل والأزمات المستترة داخل النادي الأهلي، وذكرت أن فيه أخطاء إدارية واختيارات صفقات جديدة ومدربين، وكمان تفاوت في عقود اللاعبين، وكل ده بيأثر على (أوضة اللبس) لكن للأسف كان بيتم اتهامي بالحقد، والنهارده بعد تراجع مستوى الفريق الكل بيتكلم عن نفس الكلام اللي قلته من زمان»
وأضاف: «لما حسام غالي قال إن القرارات لازم تكون جماعية، اتهاجم بشدة، لكن قلت إنه من حقه يعبر عن رأيه، وناس هاجمتني وبتقول إني بهز استقرار النادي، والنهارده الكل بيتكلم عن نفس الموضوع»
أحمد حسن أكد إنه مش منتفع ولا عنده مصلحة شخصية، بس النصيحة جايه لمصلحة الأهلي اللي كان شرف ليا إني ألبس قميصه وأمثل النادي في بطولات كتير، وده من الأندية اللي ساهمت في شهرتي.
وواصل حديثه عن أهمية تصحيح المسار في الأهلي، وضرورة وجود لجنة كرة مكونة من شخصيات لها تاريخ، وكمان لازم يكون فيه مدير رياضي له صلاحيات قوية، عشان يقدر يكتشف المواهب ويحل أي مشاكل مع اللاعبين.
وفيما يخص اختيار المدرب والصفقات، أكد إنه لازم يكون فيه دراسة عميقة، وكمان عدم وجود تفاوت كبير في عقود اللاعبين، لأن ده بيسبب مشاكل داخل الفريق.
وأشار لأهمية دعم الجماهير والإعلام في الأوقات الصعبة، لأنه من الطبيعي أي نادي يمر بكبوات، لكن الأهم إنه يتخطاها، الأهلي مر بمراحل صعبة قبل كده، ورجع للمنافسة بقوة، وعنده فرص كبيرة في الدوري.
واختتم كلامه: «لازم نعترف بالأخطاء عشان نصلحها، والجماهير لازم تقيم الأمور وتشوف من الناصح الأمين اللي بيحب النادي، وده أفضل من التضليل والتطبيل من الناس اللي عندهم مصالح»
التعليقات