الأهلي تحت المجهر وتحقيقات حول الشائعات

في الوقت اللي النادي الأهلي مشغول بالأحداث، الناقد الرياضي محمد صلاح اتكلم عن ظاهرة غريبة بدأت تطغى على الساحة الرياضية، وهي البحث عن فضائح بدلًا من الحقيقة، وده بقى شغل بعض اليوتيوبرز والإعلاميين اللي مش مهتمين بمصلحة الكيان.

صلاح قال إن الأرقام بتتوزع في كل حتة من غير أي دليل، وكأن الناس اللي بتقولها كانت موجودة وقت التوقيع، وكمان عقود بتتشرح بتفاصيل مش حقيقية، كل ده جزء من حملة مستمرة ضد الكابتن محمود الخطيب، وكأن البعض شايف إن التقرب من ياسين منصور لازم يكون على حساب استقرار النادي.

من ناحية تانية، صلاح كمشجع أهلاوي بيقول إنه مش فارق معاه مين بياخد كام أو إيه اللي بيتقال عن الرواتب، المهم بالنسباله هو اللي بيحصل داخل الملعب، عايز يشوف فريق قوي ومتألق، فريق يليق باسم الأهلي، مش فوضى وضجيج.

وأكد صلاح إن اللي بيحصل دلوقتي هو ارتزاق على الأزمات، في محاولة لصناعة الشك وزرع الانقسام، الناس دي مش مهتمة بمصلحة النادي، قد ما هي مهتمة بمصلحتها الشخصية، همهم الأول هو الترند، لو ملاقوش أزمة صنعوها وباعوها للجمهور كأنها حقيقة.

وفي النهاية، وجه صلاح رسالة لياسين منصور، وقاله إن الطريق ليك مليان متسلقين، والناس دي مش عندها ولاء، تتقرب لما تكون المصلحة وتختفي لما تتغير الظروف، وعشان كده لازم تكون حذر لأن نفس الوجوه اللي بتحاول تتودد لك النهارده، هي نفسها اللي ممكن تبحث عن فضيحة بكرة لو لقت مكسب في ده.