محمد الجباس “دودو الجباس” لاعب بيراميدز، أشار إلى أن الجيل الحالي من اللاعبين محظوظ بشكل كبير بفضل السوشيال ميديا، في زماننا كنا بنضيع وقت طويل عشان نكسب شهرة، دلوقتي أي لاعب يسجل هدف أو يعمل كورة حلوة، على طول السوشيال ميديا كلها بتشير له وبتتكلم عنه، لكن برضه في جانب سلبي لأن بعض الكلام ممكن يكون مجاملات مش حقيقية.
وتابع “دودو” في تصريحات لبرنامج نجوم دوري نايل مع أحمد المصري على أون سبورت إف إم: هنا بقى عقلية اللاعب وشخصيته بتكون مهمة، لازم يفهم إنه مافيش إنجاز بدون تعب وجهد، والضغط الجماهيري والسوشيال ميديا مش سهل، الشهرة جميلة بس لازم يكون عنده قدرة على التعامل مع الجوانب السلبية
وأضاف دودو: لما كنت صغير كنت بدور على قدوة، ولما انضميت لمنتخب مصر وشوفت نجوم زي محمد زيدان ومتعب، كنت معجب بكل تفاصيل شغلهم، طريقة تعاملهم مع اللاعبين الصغار ونصائحهم، كل حاجة كانت بتميزهم عن الآخرين
وأكمل لاعب بيراميدز: دلوقتي في بيراميدز بحاول أكون قدوة للاعبين الشباب، أنصحهم وأساعدهم يكونوا أفضل، لأنهم بيتأثروا باللاعبين الكبار، فبذل مجهود أكبر عشان أكون نموذج يحتذى به
واختتم دودو الجباس: الموسم الماضي إبراهيم عادل كان شريكي في الغرفة، حاولت أساعده وأنصحه، وده فرق معاه بشكل كبير، هو لاعب مميز وأحد أفضل اللاعبين في مصر وإفريقيا، والحمد لله احترف لأنه فعلاً مختلف عن أي لاعب تاني في مصر حاليا
التعليقات