فيرتز يعلق على حديث فان دايك وموقف لاعبي ليفربول من سلوت قبل مواجهة باريس سان جيرمان

ظهر فلوريان فيرتز لاعب ليفربول الإنجليزي في مؤتمر صحفي اليوم الثلاثاء، للحديث قبل مباراة فريقه ضد باريس سان جيرمان في دوري أبطال أوروبا.

ليفربول هيكون ضيف على باريس سان جيرمان في ملعب “حديقة الأمراء” في ذهاب ربع نهائي دوري أبطال أوروبا موسم 2025-2026، والمباراة جاية بعد هزيمة الفريق أمام مانشستر سيتي برباعية نظيفة في كأس الاتحاد الإنجليزي.

قال فيرتز: “طبعًا كنا نطمح لموسم أفضل، عندنا أهداف حابين نحققها، الفريق فاز بالدوري الإنجليزي الموسم الماضي، وكان هدفنا نكرر النجاح ده، لكن لسه عندنا فرصة في دوري أبطال أوروبا ونتأهل للموسم الجاي”

وأضاف: “عندنا أهداف نشتغل عليها، كنا عايزين موسم أفضل، لكن لسه عندنا فرص، دوري الأبطال بطولة كبيرة، والمباريات فيها دايمًا لها طابع خاص، بنحاول نستمتع ونبدأ من أبعد نقطة ممكنة، نعرف إن الفرق الكبيرة بتلعب هنا، وده فرصة نعرف مستوانا”

وعن تصريح زميله فيرجيل فان دايك بخصوص استسلام ليفربول أمام مانشستر سيتي، قال: “ما كنتش عارف إنه قال كده، لكن مش متفق معاه تمامًا، حاولنا نخلق فرص لتغيير نتيجة المباراة، طبعًا لما توصل الدقيقة 80 وأنت متأخر 3-0، بيكون صعب تكمل”

وأشار: “حاولنا نقدم أفضل ما عندنا، حتى لما كانت النتيجة 3-0 أو 4-0، كان عندنا فرص، مش من مستوانا نخسر 4-0 قدام السيتي، كنا عايزين نتأهل، السنة الجاية لازم نقدم أداء أفضل”

وفيما يتعلق برد الفعل بعد مباراة مانشستر سيتي، أوضح: “أظهرنا الموسم ده إننا نقدر نلعب كويس في المباريات الكبيرة، خاصة في دوري الأبطال، الجولة الأخيرة ضد جالطة سراي ما كانتش سهلة، لكن عندنا ثقة في نفسنا وفريق متماسك بلاعبين مميزين”

وواصل: “مع مدرب كفء بيعمل جهد كبير عشان يحضرنا للمباراة، عارفين إن المباراة الثانية عندنا ممكن تكون في صالحنا، لكن لازم نبذل جهدنا ونثق في نفسنا، ونسعى لتحقيق نتيجة إيجابية في أنفيلد”

وعن إذا كان اللاعبين لسه بيلعبوا عشان مدربهم سلوت، أكد: “أيوة، طبعًا، بنؤمن بالمدرب، والفريق لازم يؤمن بيه لأنه فاز بالدوري الموسم الماضي، وقدمنا مباريات كويسة”

وتابع: “كنا عايزين الوضع يكون أفضل، لكن ده واقعنا دلوقتي، ولسه عندنا كتير نلعب من أجله، كل اللي ممكن أقوله هو إننا مؤمنين بالمدرب وسنسعى لتقديم أفضل ما عندنا”

وعن استقبال الهدف الأول، أصر: “محتاجين 90 دقيقة من الطاقة والالتزام، لو مش هنبقى كده، مش هيبقى عندنا فرصة، لازم نكون متماسكين حتى في اللحظات الصعبة، لو استقبلنا هدف، لازم نؤمن بقدرتنا على الفوز”

وأسترسل: “عايزين نتيجة جيدة، لازم نكون متماسكين حتى في اللحظات الصعبة، في نهاية الأسبوع الماضي، بالغنا في الحماس شوية، وكنا متهورين، لازم نصحح ده في المباراة الجاية”

وصمم فيرتز: “هنبذل قصارى جهدنا، لازم نكون مركزين 90 دقيقة في كلتا المباراتين”

وعن زميله هوجو إيكتيكي في مواجهة فريقه السابق، قال: “المباراة دي هتكون مميزة له لأنه لعب هنا، أتمنى إنه يستمتع ويدخل هدف”

وبشأن أول مباراة له في ربع نهائي دوري الأبطال، قال: “المباريات دي حلم أي لاعب، حلمت بيها لما انضميت للنادي، لذلك هنبذل جهدنا للظهور بشكل جيد”

وأتم: “ليالي دوري الأبطال دايمًا مختلفة، بتواجه فرق من دول وأساليب لعب مختلفة، استمتعنا بالمباريات، متشوقين لمواجهة باريس سان جيرمان”