شن إبراهيم نور الدين، رئيس لجنة الحكام السابق، هجومًا على الكولومبي أوسكار رويز، رئيس لجنة الحكام الحالي، وده كان خلال حديثه على قناة “سي بي سي”.
قال نور الدين: “لما يكون فيه خبير أجنبي ويسند لحكم جاي من ليبيا، ومش مرتاح، يحكم مباراة، هل ده تفكير إداري سليم؟ كان الأولى إنه يحكم مباراة الأهلي وسموحة لو كان هياخد راحة قبل كده”
في نفس السياق، تساءل نور الدين عن دور كابتن وجيه والدكتور عزب وأعضاء اللجنة، ليقول: “ليه هم موافقين على الأخطاء دي؟ لازم يسجلوا اعتراضهم ويبلغوا اتحاد الكرة علشان يكون فيه موقف”
واستمر في حديثه: “في الآخر أوسكار هيفضل سنة ويرحل، لكن اللي بيحصل ده هيستمر معانا كحكام، مصر مليانة كفاءات وخبرات تقدر تدير التحكيم، الحكام المصريين هم اللي أداروا التحكيم عبر العصور”
وأضاف: “فيه حالة عدم ثقة في الحكام ولجنة الحكام، والاعتراضات بقت غير مقبولة، هل الخبير الأجنبي زود أو طور التحكيم المصري؟ هل التطوير يكون بجلب حكم أجنبي مش مرتاح لحكم مباراة تحت ضغط كبير؟”
وأشار نور الدين إلى فشل تجربة الخبير الأجنبي في مصر، وقال: “الأندية اللي طلبت كده زمان، دلوقتي بتشتكي”. وأكد على إنه في مباراة الأهلي وسيراميكا كليوباترا مفيش جدل، وطلب من المسؤولين يتحلوا بالشجاعة ويعترفوا بالخطأ.
التعليقات