وضع الأهلي الحالي يثير التساؤلات بشكل كبير، خصوصًا بعد تصدر الزمالك لجدول الدوري رغم كل الظروف الصعبة اللي مر بيها الفريق، الكلام ده جاي على لسان وليد صلاح عبد اللطيف، نجم الزمالك السابق.
في تصريحات له عبر برنامج “نمبر وان” مع محمد شبانة على قناة CBC، قال عبد اللطيف: “اللي بيحصل في الأهلي دلوقتي حاجة غير متوقعة، وصعب تخيل إن الزمالك يتصدر الدوري في ظل الظروف اللي كان بيعاني منها”.
وأضاف: “اللاعبين في الأهلي بقى عندهم رهبة من استلام الكرة، خوفًا من الظهور بشكل سيئ، وده بيظهر غياب شخصية الفريق، بالإضافة لتراجع الأداء بشكل ملحوظ”.
وتابع: “المدرب تورب يمتلك شخصية قوية، لكن مش مناسبة لطبيعة اللاعبين الموجودين في الفريق حاليًا”.
وأشار إلى وجود أزمة داخل غرفة الملابس، حيث قال: “بعض اللاعبين في الأهلي شايفين نفسهم أكبر من النادي، رغم إن الإدارة وفرت عناصر مميزة ولاعبين أصحاب خبرات”.
واستكمل: “المشكلة هنا في الفوارق داخل الفريق، سواء في الرواتب أو العقود، وده بيأثر على الانسجام بين اللاعبين”.
وخلص حديثه بالتأكيد على أنه إذا لم يتمكن المدرب من السيطرة على النجوم داخل الفريق، فلن يقدر يفرض أسلوبه أو يحقق النجاح، خصوصًا مع وجود لاعبين كبار محتاجين إدارة قوية.
التعليقات