أدلى ييس توروب، المدير الفني للنادي الأهلي، بتصريحات بعد الفوز الصعب على سموحة 2-1 في مباراة أقيمت على استاد القاهرة، في الجولة الثانية من المرحلة النهائية لمجموعة التتويج في الدوري المصري الممتاز لموسم 2025-2026.
المؤتمر الصحفي لـ توروب
قال توروب بعد المباراة في المؤتمر الصحفي:” الأهم هو الفوز، وانتصار اليوم سيعطي دفعة معنوية للاعبين ويخفف الضغوط عليهم، مش بنعاني من أي مشاكل بدنية والاحصائيات تثبت كده، فيه بعض اللاعبين كانوا مش في مستواهم، ولذلك بنعمل تغييرات في الملعب، مش هنكسب بـ11 لاعب بس، لازم نجهز كل البدلاء عشان يكونوا جاهزين، حسين الشحات كان جيد في مباراة سيراميكا كليوباترا فاستحق يلعب النهاردة بالكامل، ولو لاعب مش موفق ببدله عشان أعطي فرصة لبديل آخر”
هيرتاحوا من وشي وزعيقي
وتابع ييس توروب، رغم الانتقادات اللي بتوجه له بسبب نتائج الأهلي وخروجه من البطولات هذا الموسم، واللي متبقي له لقب الدوري يتنافس عليه مع الزمالك وبيراميدز قائلاً:” قررت أدي اللاعبين راحة من التدريبات لحد نهاية الأسبوع، قلت لهم أكيد تعبانين من الزعيق، فخليتهم يرتاحوا مني شوية ويقضوا وقت مع أهلهم بعيد عن ضغط المباريات، ده الوقت المناسب للراحة، مش بالضرورة تكون الراحة بدنية، لكن هي فرصة لاستعادة القوة والتركيز، ولازم يستعدوا لمباريات الدوري الحاسمة”
قسوت عليهم في أوضة اللبس
واختتم ييس توروب تصريحاته بعد الفوز قائلاً:” زي ما قلت للاعبين، كرة القدم فيها عنصر الثقة والإيمان بالنفس، كنت سعيد جداً بالأداء اللي قدمناه في أول 25 دقيقة وسجلنا هدف، كنت قاسي عليهم بين الشوطين وقلت لهم ليه نوقف اللعب بعد ما نتقدم 0-1، اللاعبين تراجعوا وكانوا خايفين، وقلت لهم ده وقت اللعب لتحقيق المكسب، أنا شايف إن الفريق قدم أداء جيد ولعب لآخر دقيقة، مكنش سهل اللعب قدام سموحة في الظروف الحالية، فبحيي الفريق كله على الأداء والنتيجة، وأنا سعيد إن عندنا لاعبين زي طاهر، اللي مر بظروف صعبة ورجع النهاردة وسجل هدف الفوز”
التعليقات