قبل مواجهة منتخب مصر، المدير الفني لمنتخب بنين، جيرنوت رور، أكد على صعوبة اللقاء، مشيرًا إلى أن فريقه يدخل المباراة بدون ضغوط، لكن لديه الطموح لتحقيق مفاجأة في كأس أمم إفريقيا 2025.
منتخب مصر تحت قيادة حسام حسن يستعد لملاقاة منتخب بنين غدًا الإثنين 5 يناير، في دور الـ16 من البطولة الإفريقية.
وفي المؤتمر الصحفي، قال رور: “المباراة هتكون صعبة جدًا لأننا قدام منتخب قوي زي مصر، بس إحنا مش أول مرة نلعب ضد فرق كبيرة، واكتسبنا خبرات من قبل، ونتمنى نكون قد التحدي”
وأضاف: “محدش متوقع إننا نكسب، لكن هنحاول نبذل كل جهدنا في الملعب، ونتمنى نحقق الفوز ونتأهل، المباراة دي مهمة لينا، وكل اللاعبين عايزين يلعبوا مباراة بحجمها”
وتابع: “سمعت عن مكافأة خاصة لو فزنا على مصر، بس مش متأكد من صحة الكلام ده، لكن أكيد أي لاعب يتمنى جائزة زي دي، والتأهل على حساب منتخب بحجم مصر يستحق مكافأة”
وعن إقامة البطولة كل أربع سنوات، قال: “شعوري بخيبة أمل بخصوص القرار ده، أعتقد إن البطولة كل سنتين أفضل، لأنها مش زي الأولمبياد، وإفريقيا عندها طبيعة خاصة، ولازم نحافظ على الحماس والشغف”
وأكد: “الطقس في شمال إفريقيا مش مناسب للعب في ديسمبر ويناير، بسبب البرد والمطر، وكلنا شفنا الأمطار في أغادير، وأتمنى الأجواء تبقى أفضل غدًا، خصوصًا إننا قدام منتخب كبير زي مصر، والتنقل بين الملاعب صعب، لأن الكرة تحتاج للتأقلم”
وواصل: “دي مشاركتنا الخامسة في البطولة، وإحنا ماشيين بشكل كويس، وده بيمنح اللاعبين ثقة، بس مش معناه إننا فريق مختلف، لأن إمكانياتنا مش زي المنافس، ورغم كده حققنا نتائج كويسة رغم غياب خمسة لاعبين وعدم احتساب ركلة جزاء بسبب الفار”
وتابع: “البنية التحتية والتنظيم ممتازين، لكن محتاجين نركز أكثر على الجانب التكنولوجي، وعملنا مفاجأة في 2019 ضد المغرب، وإن شاء الله نعمل مفاجأة تانية ضد مصر هنا في المغرب”
وأضاف: “التجربة مع بنين مختلفة عن تجربتي مع نيجيريا، التحديات مختلفة، وإحنا بنحاول نبني فريق شاب مع لاعبين ذوي خبرة، ونقدر نقدم شيء مميز لو كسبنا منتخب كبير زي مصر، خصوصًا إننا عانينا من اللعب خارج بلادنا لمدة عام ونصف”
وشدد: “ماتقدرش تقارن مباراة مصر بمباراة السنغال في دور المجموعات، لأننا لعبنا ضد السنغال بعد ما ضمنا التأهل، بينما مباراة مصر بتكون خروج مغلوب ولها طابع مختلف، والسنغال أثبتت قوتها، كما شفنا منتخب مصر قدام جنوب إفريقيا”
واختتم: “الأهم إن الأمور متتحسمش بسبب التحكيم أو تقنية الفيديو، عارفين إن منتخب مصر مرشح على الورق، لكن هنحاول نتأقلم مع المنافس، خصوصًا مع الدعم الجماهيري الكبير اللي عنده في أغادير”
التعليقات