كشف مصدر موثوق في برنامج “من القاهرة” مع الإعلامي كريم رمزي، عن وضع محمد الشناوي حارس مرمى الأهلي، وخصوصًا بعد الشائعات اللي انتشرت عن عروض خارجية أو اعتزاله.
المصدر أكد أن الشناوي حتى الآن ما عندهوش أي عروض رسمية للرحيل عن الأهلي، وكل الكلام اللي اتقال في الفترة الأخيرة اجتهادات ملوش أي أساس من الصحة.
وكشف المصدر أن قائد الأهلي مركز تمامًا على هدف واحد، وهو المشاركة في كأس العالم الجاي، لأنه عايز يحقق حلمه الشخصي، وده خلاه يؤجل أي مناقشات عن مستقبله سواء داخل أو خارج النادي.
وبالنسبة للشائعات اللي بتقول إنه بيفكر في الاعتزال، المصدر نفى الكلام ده، وأكد أن اللاعب مش عامل الاعتزال ضمن أولوياته دلوقتي، خاصة مع رغبته في الاستمرار في الملاعب بمستوى عالي.
ومع ذلك، المصدر أشار لسيناريو ممكن يغير موقف الشناوي، لو شارك في كأس العالم وحقق هدفه، وبعد كده جاله عرض مناسب من الأهلي لتولي منصب إداري أو فني، ساعتها ممكن يفكر في الاعتزال والدخول في مرحلة جديدة داخل النادي.
ولحد ما يتضح مستقبل الشناوي، الموضوع موقوف لحد إشعار آخر، خاصة بعد ما ينتهي من المشاركة الدولية المرتقبة.