وجه ييس توروب، المدير الفني للنادي الأهلي، شوية رسائل لجماهير القلعة الحمراء بعد التعادل المخيب للآمال 1-1 أمام البنك الأهلي، في المباراة اللي اتلعبت على استاد القاهرة الدولي ضمن الأسبوع الـ17 من الدوري الممتاز.
تصريحات توروب بالمؤتمر الصحفي
قال توروب في المؤتمر الصحفي بعد المباراة: “خسرنا نقطتين وللمباراة الثانية على التوالي نستقبل هدف من ضربة ثابتة، كنا نلعب ضد فريق قوي في الدفاع، محتاجين نشتغل أكتر على خلق الفرص ضد الفرق اللي بتلعب دفاعي بشكل منظم، السيطرة على المباراة والكرات العرضية مش كفاية لتحقيق الفوز”
وأضاف مدرب الأهلي: “مش عادةً بتكلم عن لاعب بعينه، لكن النهارده لازم أقول على تريزيجيه، اللي كان مقاتل في الملعب وقدم أداء رائع، حاول يحقق الفوز لآخر دقيقة رغم الإجهاد من كثرة المباريات، أنا محبط لفقدان نقطتين في سباق الدوري، لكن عندنا مباراة مهمة في إفريقيا ونحتاج نركز عليها بعد تقييم مباراة النهارده”
وعن تريزيجيه، واصل ييس توروب: “ما لعبتش بـ تريزيجيه كظهير أيسر، كنا بنلعب بثلاثي في الخلف، لأنه مميز في اللعب واحد ضد واحد، عشان كده لعب هاني في الشوط الثاني عشان نستغل الجبهة اليمنى مع بنشرقي، وندخل تريزيجيه كمهاجم ثالث لاستغلال العرضيات، لازم أتعامل مع اللاعبين الجدد عشان يعرفوا أسلوب الفريق، يوسف بلعمري كان معانا في رحلة تنزانيا وشرحت له طريقة لعب الأهلي، وهو كان مع منتخب المغرب ومش شارك في أي مباراة من 6 أسابيع، عندنا كمان كوكا وشكري، والمنافسة قوية بينهم في كل المراكز”
وتابع المدرب: “مهمتي اختيار التشكيل الأفضل، وأنا بختار اللاعبين اللي هينضموا للفريق أو اللي هيمشوا، اختياري لكوكا لأنه بيقدم أداء جيد في الجبهة اليسرى، واللاعبين بيعملوا معايا زي ما أنا عايز”
وبخصوص عقوبة إمام عاشور، قال توروب: “مش هتكلم عن لاعب مش موجود معايا، تركيزي على المجموعة اللي معايا، هحاول أدوّر بين اللاعبين عشان نتفادى الإجهاد، عارفين برنامج مباريات الفريق”
واختتم ييس توروب تصريحاته: “مش هنفوز بـ 11 لاعب بس، محتاجين 25 لاعب جاهزين، ولما يتغير لاعب في المباريات لازم نحافظ على نفس جودة الأداء، لعبنا النهارده بخمسة لاعبين كانوا غايبين عن المباريات السابقة، وبيحتاجوا وقت للتأقلم، لكن كفريق لازم نتعود على كده، لأنه مستحيل نلعب بنفس الـ11 لاعب في كل المباريات، ولازم ندي الفرصة للاعبين عشان نشوف إمكانياتهم”
التعليقات