توفيق السيد، الخبير التحكيمي، أكد إن أوسكار رويز، رئيس لجنة الحكام، هو السبب في الأزمات اللي بتحصل للحكام في الدوري المصري، وآخرها كانت أزمة مباراة الأهلي وسيراميكا كليوباترا في البطولة.
السيد قال في تصريحات لسهام صالح في برنامج الكلاسيكو إنه مستغرب إن محمود وفا هو اللي هيحكم ماتش الأهلي وسيراميكا لأنه هو اللي أدار ماتش الدور الأول، الحكم كان في بطولة ورجع مصر قبل المباراة بـ48 ساعة وبعدين راح كفر الشيخ ورجع تاني، يعني أوسكار عبقري للدرجة دي؟ أوسكار هو السبب الرئيسي في الأزمة دي، فيه حكام بتلعب 3 أو 4 ماتشات في أسبوع واحد، يعني إزاي ده؟
في نفس السياق، قال إنه مينفعش اتحاد الكرة يحدد مين اللي يروح طالما إنه سمح لحد يسمع الفار، ومفيش لائحة بتقول كده، والمفروض إنه مفيش مانع إن أي حد يمثل الأهلي، اتحاد الكرة عمل مشكلة من غير سبب، المفروض الوفد كان سمع الفار وخلاص، أوسكار مفيش عنده ثقة في الحكام المصريين اللي معاه في اللجنة.
وعن الاتهامات الجنسية اللي لاحقت أوسكار رويز، قال توفيق السيد إن الكلام ده منتشر ومعروف وقرأه في الصحف، وشاف تقارير إن أوسكار عنده قضايا لها علاقة بالآداب، والكلام ده من جرائد ومواقع كبيرة، ولو هو متهم بحاجة زي كده لازم يمشي فوراً.
التعليقات