تامر أمين علق على أزمة التحكيم في مصر، ووجه انتقادات للجنة الحكام واتحاد الكرة، مؤكدًا إن اللجنة أصبحت “يتيمة ملهاش أب”، بسبب عدم وجود دعم حقيقي، بينما اتحاد الكرة مش قادر يحل الأزمات بشكل جاد.
من ناحية تانية، الحكم الدولي السابق محمد الصباحي، في لقائه مع تامر أمين ببرنامج “آخر النهار”، كشف عن الصعوبات اللي بيواجهها الحكام، وأكد إن الدعم والرعاية شبه معدومين في منظومة كرة القدم.
الحكم بيخدم نفسه بنفسه
الصباحي أكد إن الحكم المصري بقى يعتمد على نفسه في كل حاجة، من التدريبات والتغذية لحد مصاريف العلاج والتنقل، والاتحاد مش مهتم يوفر أبسط سبل الدعم قبل المباريات المهمة.
فضيحة المواصلات والباتون ساليه
وبخصوص التنقل، قال الصباحي: “بتروح الماتشات بعربيتك الخاصة، ومفيش وسيلة مواصلات بتنقلنا لبرج العرب أو الجونة، وغير فترة كابتن شوبير كان الوضع أبيض يا ورد الجناين وكله على حسابنا”
وانتقد الصباحي التناقض في أداء الاتحاد، قائلا: “الحكام لسه مستلمين لبس من سنتين، والنهاردة بيعملوا حفلة وجايبين فيها باتون ساليه قد كده كأنها هي دي الحلول”
فشل التجربة الأجنبية
الصباحي أكد إن استقدام خبراء أجانب زي بريرا ما جابش نتيجة للتحكيم المصري، لأن “المسؤول الأجنبي مبيطلبش حقوقنا”، وده أثر على ثقة الجمهور في المنظومة، مشددًا على إن الحكم المصري هو الوحيد اللي مش بيحصل على معسكرات زي اللاعبين والمدربين، بل بيروح للملعب بمواصلات عامة في أغلب الأحيان.
وفي نفس السياق، انتقد تامر أمين تصريحات هاني أبو ريدة، رئيس الاتحاد المصري لكرة القدم، اللي قالها خلال احتفالية تسليم الشارة الدولية للحكام، ووصفها بأنها من غرائب الزمن.
واقعة غريبة في حفل الشارة الدولية
تامر أمين بدأ حديثه عن كواليس الاحتفالية، وقال: “في النهاردة واقعة حصلت غريبة جدا، كان في احتفالية لاتحاد كرة القدم المصرية عشان بيسلم الشارة الدولية للحكام.. ماشي؟”، مستنكرًا تواجد بعض الأسماء المثيرة للجدل: “والحكم محمود وفا، صاحب الواقعة الشهيرة لمباراة الأهلي وسيراميكا كليوباترا، كان بيتكرم اليوم واتسلم الشارة الدولية.. ماشي؟ ماشي”
انتقاد حاد لـ هاني أبو ريدة
وعن تصريح رئيس الاتحاد، قال أمين: “اللي مش ماشي بقى وقعدت أقلبها يمين وشمال هي الكلمة اللي قالها هاني أبو ريدة.. تصريح غريب جدا، قال: كان الله في عون الحكام المصريين، أنا قلبي معاهم والله في اللي بيتعرضوا ليه”