تحدث الحكم الدولي السابق محمد الصباحي عن معاناة الحكام المصريين في حوار مع الإعلامي تامر أمين، واعتبرهم الحلقة الأضعف في كرة القدم المصرية، مشيراً لغياب الرعاية والدعم الكافي لهم.
الحكم بيخدم نفسه بنفسه
أوضح الصباحي إن الحكم المصري مضطر يعتمد على نفسه في كل شيء، من التدريبات والتغذية لحد مصاريف العلاج والتنقل، وده لأن اتحاد الكرة مش مهتم يوفر لهم أي دعم قبل المباريات المهمة.
فضيحة المواصلات والباتون ساليه
وعن مشكلة التنقل، قال الصباحي: “بتروح الماتشات بعربيتك الخاصة، مفيش مواصلات تنقلنا لبرج العرب أو الجونة، وغير فترة كابتن شوبير كان الوضع أفضل بكتير، وكل حاجة على حسابنا”
انتقد الصباحي أيضًا الفجوة في أداء الاتحاد، حيث قال: “الحكام لسه مستلمين لبس من سنتين، والنهاردة بيعملوا حفلة وجايبين فيها باتون ساليه كأنها هي الحل”
لجنة يتيمة بلا أب
من ناحية تانية، وصف تامر أمين لجنة الحكام بأنها “الجهة الوحيدة اليتيمة اللي ملهاش أب”، وأكد إن المسؤولية تقع على عاتق اتحاد الكرة اللي سايب الحكام بدون حماية أو وسيلة انتقال رسمية تليق بهم.
فشل التجربة الأجنبية
الصباحي أكد إن استقدام خبراء أجانب زي بريرا لم يفيد التحكيم المصري، لأن “المسؤول الأجنبي مبيطلبش حقوقنا”، وده أدى لاهتزاز الثقة في المنظومة، مشيراً إن الحكم المصري مش بيلقى نفس الدعم اللي بياخده اللاعبون والمدربون، وغالبًا بيستخدم مواصلات عامة.
في نفس السياق، انتقد تامر أمين تصريحات هاني أبو ريدة، رئيس الاتحاد المصري، خلال احتفالية تسليم الشارة الدولية للحكام، واعتبرها غريبة.
واقعة غريبة في حفل الشارة الدولية
أشار تامر أمين لكواليس الاحتفالية وقال: “كان في احتفالية لاتحاد كرة القدم المصرية عشان بيسلم الشارة الدولية للحكام، وكان موجود فيها أسماء مثيرة للجدل، زي الحكم محمود وفا اللي حصلت له واقعة مشهورة في مباراة الأهلي وسيراميكا كليوباترا، وكان بيتكرم اليوم”
انتقاد حاد لـ هاني أبو ريدة
وبخصوص تصريح رئيس الاتحاد، قال أمين: “التصريح اللي قاله هاني أبو ريدة كان غريب جداً، قال: كان الله في عون الحكام المصريين، أنا قلبي معاهم في اللي بيتعرضوا ليه”